ಒಮ್ಮೆ ಒಬ್ಬ ಚಿತ್ರಕಾರ ತನ್ನ ಮೊದಲ ಕಲಾಕೃತಿಯನ್ನು ನಾಲ್ಕು ರಸ್ತೆಗಳು ಸೇರುವ ವೃತ್ತದಲ್ಲಿ ಪ್ರದರ್ಶಿಸಿದ. ಅದರ ಕೆಳಗೆ “ಇದು ನನ್ನ ಮೊದಲ ಚಿತ್ರ. ಲೋಪಗಳು ಕಂಡಲ್ಲಿ, ದಯವಿಟ್ಟು ಆ ಜಾಗದಲ್ಲಿ ನಕ್ಷತ್ರ ಗುರುತು ಮಾಡಿ.” ಎಂದು ಬರೆದ.
ಸಂಜೆ ಹೊತ್ತಿಗೆ ಆ ಚಿತ್ರದ ಮೇಲೆ ಅಸಂಖ್ಯಾತ ನಕ್ಷತ್ರ ಚಿಹ್ನೆಗಳು ಮೂಡಿದ್ದವು. ಅದನ್ನು ನೋಡಿ ಕಲಾವಿದನಿಗೆ ಕಣ್ಣೀರಾಯಿತು. ಅವನು ಗುರುವಿನ ಬಳಿ ಹೋಗಿ, “ನನಗೆ ಚಿತ್ರಕಲೆಯೇ ಬರದು” ಎಂದು ವಿಷಾದಿಸಿದ.
ಗುರುಗಳು ನಗುತ್ತಾ, “ಅದೇ ಚಿತ್ರವನ್ನು ಮತ್ತೆ ತೆಗೆದುಕೊಂಡು ಬಾ” ಎಂದರು.
ಎರಡನೇ ಬಾರಿ ಅದೇ ಸ್ಥಳದಲ್ಲಿ ಆ ಚಿತ್ರವನ್ನು ಇರಿಸಿ, ಕೆಳಗೆ “ಇದು ನನ್ನ ಮೊದಲ ಚಿತ್ರ. ಲೋಪಗಳು ಕಂಡಲ್ಲಿ, ಕೆಳಗಿರಿಸಿರುವ ಕುಂಚ ಮತ್ತು ಬಣ್ಣಗಳನ್ನು ಬಳಸಿ ದಯವಿಟ್ಟು ಸರಿಪಡಿಸಿ.” ಎಂದು ಹೊಸ ಸೂಚನೆ ಬರೆಸಿದರು.
ಒಂದು ವಾರ ಕಳೆಯಿತು – ಆದರೆ ಯಾರೂ ಒಂದು ಗೆರೆಯನ್ನೂ ಸರಿಪಡಿಸಲಿಲ್ಲ.ಯಾರೋ ಒಬ್ಬರು ಬಂದು ಸರಿಪಡಿಸಬಹುದೆಂದು ಅವನು ಕಾಯ್ದ; ಆದರೆ ಎಲ್ಲರೂ ಮೌನವಾಗಿ ಹಾದು ಹೋದರು.
ಆಗ ಅವನಿಗೆ ಸತ್ಯ ಅರಿವಾಯಿತು:
ತಪ್ಪುಗಳನ್ನು ಹುಡುಕಿ ತೋರಿಸಲು ಸಾವಿರಾರು ಮಂದಿ,
ಆದರೆ ತಪ್ಪುಗಳನ್ನು ಸರಿಪಡಿಸಲು ಯಾರೂ ಮುಂದೆ ಬರುವುದಿಲ್ಲ.
ಕಾರಣ – ಟೀಕೆ ಮಾಡುವುದು ಸುಲಭ, ಸರಿಪಡಿಸುವುದು ಕಷ್ಟ ಮತ್ತು ಜವಾಬ್ದಾರಿಯ ಕೆಲಸ.
ನೀತಿ :- ಜನರ ನಿಂದನೆ, ಅವಹೇಳನ, ಅಪಹಾಸ್ಯ – ಇವೆಲ್ಲವೂ ಬಾಹ್ಯ ಪ್ರಪಂಚದ ಪ್ರತಿಧ್ವನಿಗಳು. ಅವುಗಳಿಗೆ ತಲೆಕೆಡಿಸಿಕೊಳ್ಳದೆ, ನಿಮ್ಮ ಸ್ವಾಭಿಮಾನ ಮತ್ತು ಆತ್ಮವಿಶ್ವಾಸವನ್ನು ಗಟ್ಟಿಯಾಗಿ ಹಿಡಿದುಕೊಳ್ಳಿ. ಯಾರೂ ನಿಮ್ಮನ್ನು ಸರಿಪಡಿಸಲು ಬರದಿದ್ದರೂ, ನೀವೇ ನಿಮ್ಮ ಪಥದ ಸುಧಾರಕರು. ಮುಂದುವರೆಯಿರಿ, ಬೆಳೆಯಿರಿ – ಕಲೆ ಮಾತ್ರವಲ್ಲ, ಬದುಕಿನಲ್ಲೂ. “ಟೀಕೆಗಾರರು ಜಗತ್ತಿನಲ್ಲಿ ಸಿಗುವರಷ್ಟೇ ಸುಲಭ; ಆದರೆ ಪರಿಹಾರ ನೀಡುವ ಹಸ್ತ ಅಪರೂಪ. ನಿಮ್ಮ ದಾರಿ ನಿಮ್ಮದು – ಅದನ್ನು ಪ್ರೀತಿಯಿಂದ ಕಟ್ಟಿಕೊಳ್ಳಿ.”
ಷ.ಬ್ರ.ಡಾ.ಅಭಿನವ ರಾಮಲಿಂಗ ಶ್ರೀ
📞 – 9341137882, 9845763534.
